Lorategian jarriko dituzun espezieak aukeratzean, onena bertako espezieak jartzea da. Izan ere, espezie horiek guztiz egokituta egoten dira bizi garen tokiko baldintza klimatikoetara, eta, horrela, gutxiagotan ureztatu behar izaten dira; haien hazkuntza-zikloa urteko sasoi bakoitzaren ezaugarri meteorologikoen arabera erregulatzen delako.
Bildu gure udalerriko edo eskualdeko natur inguruneetako edo landu gabeko lursailetako landaretzari buruzko informazioa.
Horrez gain, zure inguruko haztegirik gehienetan bertako espezie asko eta asko aurkitu ahal izango dituzu, beraz, zoaz haietara eta galdetu saltzaileei. Beraiek esango dizute zein diren kasu bakoitzerako landarerik egokienak.
Bizkaian soropilak beste leku idorrago batzuetan baino ur-kontsumo txikiagoa behar izaten du; baina, hala ere, eremu batzuetan landare-errezelak jar daitezke, edo zuhaitzak (haritzak, gaztainondoak, lizarrak, haltzak, etab.) eta zuhaixkak, horiek are gutxiago ureztatu behar dira eta.
Lorategiko eremu batzuk beste material batzuekin ere estal daitezke: harriak, legarra, enbor-azalak, etab. Lurrunketa bidezko ur-galerak eragozteko teknikarik eraginkorrenetakoa da, eta, era berean, efektu estetiko ona ere lortzen da.
Landareak behar duten ur-kantitatearen arabera sailkatuz gero (zonifikazioa), askoz ere modu eraginkorragoan ureztatuko ditugu: ur gehien behar dutenak elkarrekin badaude, beste eremuak ez dira horrenbeste ureztatu beharko.
Ureztatzea malgutasunez antolatu behar da, eguraldia kontuan hartuta. Ureztatzen hasi aurretik lurzoruaren hezetasun maila egiaztatzea komeni da; baita haize handia dabilenean edo berorik handieneko orduetan ez ureztatzea ere, lurrunketa bidezko ur-galerak ez areagotzeko.
Zuhaitzak eta zuhaixkak gutxitan baina oparo ureztatu behar dira. Landareek, horrela, hobeto garatuko dituzte sustraiak, eta lehorteak hobeto jasango dituzte.
Soropilari 5/6 cm-raino hazten utzi behar zaio, horrela ur gutxiago beharko du eta.
Udan ongarrien erabilera mugatuz gero, landareek ur gutxiago eskatuko dute.
Hauek dira kontsumo txikiko lorezaintzan gehien erabiltzen diren eta ortuak ureztatzeko uraren erabilera eraginkorrena egiten duten bi ureztatze-sistemak:
Aspertsiozko ureztapena: ura aspertsoreen (birakariak) edo difusoreen (finkoak) bidez zabaltzen da. Oso aproposa da soropilak ureztatzeko, emaria eta hedadura oso desberdinak izan daiteke; beraz, oso ondo doitu behar da kasu bakoitzean.
Ureztapen lokalizatua: ura leku jakin batzuetan zabaltzen duten tutuak dira. Emaria aldakorra izaten da (4-16 l/h). Sistema honen abantaila nagusia kontsumoa asko murrizten duela da, lurrunketa bidezko galerak eragozten dituelako eta ureztapen-ura lokalizatuta zabaltzen delako.
Ureztatzeko moduon gauzarik oinarrizkoena da ureztatze-sistema oso erraz automatiza daitekeela. Ondorioz, espezie batek behar duen ur-kantitatea oso erraz egoki daiteke, kokalekuaren eta unean uneko baldintza meteorologikoen arabera. Automatizazio horiek, halaber, beste sistema batzuekin osa daitezke; hala nola, emari- edota presio-mugagailuekin.
Euri-ura jasotzeko eta erabiltzeko instalazio batek ondo funtzionatzeko, lehenengo eta behin, planifikazio ona egin behar da, eta hura eraikitzeko elementuak kontu handiz aukeratu behar dira.
Kontuan hartu beharreko puntu garrantzitsu bat da tanga zer lekutan jarriko den eta zer material erabiliko diren.
Euri-urak jasotzeko ekipoak oinarrizko elementu hauek ditu:
Jasotzea: euri-ura etxeko zereginetarako jaso nahi badugu, normalean, teilatuaren azalera erabiltzen da jasotzeko. Horretarako, jasotzeko sistemara euri-ura behar bezala jausteko, teilatuak azalera eta malda egokiak izan behar ditu. Eredu honek badu beste etekin bat ere; hau da, kokalekuaz gain, uraren kutsadura ere murriztu egiten du.
Biltzea eta eramatea: ura teilatu-hodien bidez jaso eta ur-andelera eramaten duen sistema da. Aurretik, komenigarria da hostoak eta antzekoak sartzea eragozteko sistemaren bat ezartzea.
Iragazkia: nahitaezkoa da andelaren ahoan iragazki bat jartzea, zikinkeria ezabatzeko, zisternara sar ez dadin. Ez da gomendatzen euri-ura patinean edo andelean iragazkirik gabe jasotzea.
Patina: iragazitako ura andel honetan biltzen da. Gainezkabidea eta husteko sifoia izaten ditu, isuririk izan ez dezan eta kanpotik animaliarik sar ez dadin. Ekipoa lurpean sartzea edo sotoan instalatzea izaten da onena, horiek dira lekurik aproposenak. Hala ere, eta ezin bada hori egin, argia pasatzea ekidin behar da, bestela algak hazi daitezkeelako.
Ponpa. Andela lurpean edo sotoan badago, ponpa bat beharko da ura banatu ahal izateko.