Sina ezazu ura aurreztearen aldeko konpromiso instituzional bat.
Egin enpresan uraren azterketa bat, uraren kudeaketa eraginkorrerako programa bat egin, ezarri eta ebaluatu ahal izateko.
Jakinarazi enpresako langileei zer neurri hartu diren uraren kontsumoa murrizteko.
Ekoizpen-prozesuan aldaketa jakin batzuk eginez gero, murriztu egin daiteke uraren kontsumoa industrietan. Helburu hori lortzeko jarduerarik ohikoenak inbertsiorik txikienarekin etekinik handiena bilatzen dutenak dira:
Hozte-zirkuituan aldaketak egitea, zirkuitu irekiak zirkuitu itxi bihurtuta. Hozteko sistemetan kontsumitzen dena etxeko erabilerarako ez den kontsumoaren %30 ingurukoa dela kalkulatzen da.
Ur gordina egokitzeko sistemak, biguntzekoak, hobetzea, uraren eta gatzaren kontsumoa murriztuz. Gazitasuna murrizteak berebiziko garrantzia du urak kontserbatzeko.
Uren barne-birziklapena. Birziklatuz gero uraren kontsumoa murriztu egiten da eta, ondorioz, hondakin uren emaria ere murriztu egiten da. Definizioz, birziklapenak hondakin uren kalitatearekin bateragarria den aplikazio batean tratatu gabeko hondakin urak erabiltzea eskatzen du. Garrantzitsua da ulertzea zer ezberdintasun dagoen hondakin uren birziklapenaren eta berrerabileraren artean. Zehatz-mehatz, birziklatzera bideratutako ahaleginak bereizi egiten dira tratamendutik, eta tratatu gabeko ura zuzen-zuzenean beste aplikazio batean erabiltzen da. Uraren berrerabileran, ostera, ura tratatu egiten da beste edozein aplikaziotan erabili baino lehen. Ahal denean, birziklapenak areagotu egiten du modu eraginkor batean uraren bizitza erabilgarria.
Industrietako hondakin urak birziklatzeko aukerak aldatu egiten dira industria batetik bestera. Izan ere, ur horiek erabiliko dituen prozesuko kalitate-eskakizunen mende dago. Era berean, hondakin uren birziklapenak ez duenez inolako tratamendurik eskatzen, jarduera-eremua berrerabileraren kasukoa baino txikiagoa da.
Enpresako bertako ur araztuak berrerabiltzea. Prozesuaren barruan ura (tratatu eta gero) berrerabiliz gero, ur-eskaria murriztu egiten da. Zeharka beste etekin bat ere lortzen da; hau da, isurien segregazioa; tratatu beharreko uraren bolumena ere murriztu egiten da, azken tratamendu horien mesedetan; eta, batzuetan, lehengaiak edota azpiproduktuak berreskuratzeko aukera ere ematen du. Hondakin urak, tipologia eta tratamendu-sistemak kontuan hartuta, hozteko ur gisa erabil daitezke zirkuitu irekietan, erdi-irekietan edo itxietan; baita behe- zein goi-presioko galdaren elikatze-ur gisa edo prozesuko ur gisa ere.
Ekoizpen-bideak hobetzea, makina zaharrak ordezkatuz.
Ekipoak eta instalazioak garbitzeko jarduerak optimizatzea. Uraren kontsumoari dagokionez, lantzeko eta emaitza positiboak lortzeko punturik errazenetako bat garbiketa-lanena da. Garbiketa oso garrantzitsua da mantentze-lanetan, eta egunean ordu asko ematen dira horretan.
Hori dela eta, uraren erabilera eraginkorrerako hobekuntza guztiek eragingo dute kontsumoaren murrizketa handi bat. Hauek dira horretarako kontuan hartu beharreko alderdi batzuk:
Garbiketarako gailu mekanikoak.
Goi-presioko sistemak.
Tangen estaldura.
Korrontez kontrako garbiketen sekuentzia.
Garbiketa-lanen koordinazioa.
Ekoizpenaren koordinazioa.
Hodiak bitarteko mekanikoen bidez garbitzea.
Lehorrean garbitzeko metodoak.
Pintatzeko kabinetan aire-gortinak erabiltzea.